Duke udhëtuar drejt Evropës për të marrë pjesë në Konferencën e Sigurisë në Mynih, sekretari amerikan i Shtetit Marco Rubio foli për një epokë të re në rendin botëror, duke paraqitur qartë qëndrimin dhe pritshmëritë e SHBA-së.
Rubio përfaqëson Shtetet e Bashkuara në konferencën e parë të madhe globale që prej momentit kur presidenti Donald Trump kërcënoi sovranitetin e Danimarkës me premtimin për të aneksuar Groenlandën.
“Bota po ndryshon shumë shpejt para syve tanë”, deklaroi Rubio para gazetarëve, kur u pyet nëse mesazhi i tij për evropianët do të ishte më pajtues sesa një vit më parë.
“Po jetojmë në një epokë të re në gjeopolitikë dhe kjo do të kërkojë nga të gjithë ne të rishqyrtojmë se si duket kjo epokë dhe cili do të jetë roli ynë”, shtoi ai.
Rubio pritet të shmangë tonin e ashpër që kishte përdorur vitin e kaluar zëvendëspresidenti amerikan JD Vance. I pyetur nëse synonte të ishte më i moderuar, ai u tha gazetarëve se evropianët “duan të dinë se ku po shkojmë, ku do të donim të shkonim dhe ku do të donim të shkonim së bashku me ta”.
Kujtojmë se në konferencën e vitit të kaluar, Vance kishte sulmuar ashpër Evropën, përfshirë Mbretërinë e Bashkuar, për politikat e saj mbi lirinë e shprehjes dhe migracionin.
Tensionet janë rritur muajt e fundit, pasi Trump ka deklaruar vazhdimisht se Groenlanda është jetike për sigurinë kombëtare të SHBA-së, duke pretenduar pa prova se ajo ishte “e mbuluar me anije ruse dhe kineze kudo”.
Këto deklarata janë parë nga shumë liderë evropianë si një moment kritik që ka dëmtuar besimin me aleatin e tyre më të madh.
Para konferencës, tetë ish-ambasadorë amerikanë në NATO dhe tetë ish-komandantë të lartë amerikanë në Evropë publikuan një letër të hapur, duke i bërë thirrje Uashingtonit të ruajë mbështetjen ndaj aleancës perëndimore të mbrojtjes.
