Sekretari amerikan i Shtetit, Marco Rubio, ndodhet në Francë për një takim të ministrave të Jashtëm të Group of Seven (G7), pasi Donald Trump kritikoi vendet e NATO për hezitimin ose refuzimin për t’u përfshirë në luftën kundër Iranit.
I pyetur nga gazetarët për pritjen që pret të ketë në këtë takim, Rubio tha para nisjes se pret të zhvillojë bisedime të mira me homologët e tij.
“Nuk jam atje për t’i bërë ata të lumtur. Me të gjithë kam marrëdhënie të mira në nivel personal dhe punojmë me qeveritë e tyre me shumë kujdes. Por njerëzit që dua të bëj të lumtur janë qytetarët e Shteteve të Bashkuara. Për ta punoj. Nuk punoj për Francën, Gjermaninë apo Japoninë,” tha ai.
Rubio u nis nga Uashingtoni për në takimin e G7 vetëm disa orë pasi Trump kritikoi ashpër vendet e NATO-s që, sipas tij, nuk po bëjnë sa duhet për të mbështetur SHBA-në dhe Izraelin në sulmet ndaj Iranit.
“Sinçerisht, mendoj se vendet në mbarë botën, edhe ato që ankohen pak për këtë situatë, duhet të jenë mirënjohëse që Shtetet e Bashkuara kanë një president të gatshëm të përballet me një kërcënim të tillë,” tha Rubio gjatë një mbledhjeje të kabinetit të enjten.
