Presidenti i SHBA-së, Donald Trump, dha urdhrin përfundimtar për operacionin ushtarak kundër Iranit pas një bisede telefonike me kryeministrin izraelit Benjamin Netanyahu, i cili argumentoi se ishte momenti më i mirë për të eliminuar liderin suprem iranian, Ali Khamenei. Kjo bëhet e ditur nga burime të njohura me diskutimet, sipas një raportimi të Reuters.
Më pak se 48 orë para se të nisnin sulmet e përbashkëta SHBA-Izrael kundër Iranit, Netanyahu telefonoi Trump për ta bindur për nevojën e një operacioni të tillë, një luftë e komplikuar dhe e largët nga ajo që presidenti amerikan kishte kundërshtuar gjatë fushatave të tij politike.
Sipas burimeve të informuara nga raportet e inteligjencës, Trump dhe Netanyahu kishin marrë njoftim se lideri suprem iranian Ali Khamenei dhe bashkëpunëtorët e tij të afërt do të mblidheshin në rezidencën e tij në Teheran, duke u bërë potencialisht objekt i një “sulmi të tipit decapitation”, që synon eliminimin e lidershipit të një shteti.
Fillimisht takimi ishte parashikuar për natën e së shtunës, por inteligjenca e re sugjeronte se ishte afruar për në mëngjesin e së shtunës, gjë që e bënte momentin edhe më të favorshëm për një goditje.
Netanyahu, i cili prej dekadash kishte kërkuar një operacion të tillë kundër Iranit, argumentoi se mund të mos kishte më një rast më të mirë për të vrarë Khamenein dhe për të hakmarrë për përpjekjet e mëparshme të Iranit për të vrarë Trumpin. Një prej tyre ishte një komplot i vitit 2024 për një atentat me pagesë ndaj Trumpit, kur ai ishte kandidat presidencial.
Sipas burimeve, në momentin e telefonatës Trump kishte miratuar tashmë idenë e një operacioni ushtarak kundër Iranit, por ende nuk kishte vendosur kur dhe në çfarë rrethanash SHBA do të përfshihej drejtpërdrejt.
Forcat amerikane kishin javë që shtonin praninë ushtarake në rajon, çka brenda administratës krijonte bindjen se vendimi për sulm ishte vetëm çështje kohe. Një datë e mundshme ishte shtyrë më herët për shkak të kushteve të këqija të motit.
Reuters nuk ka mundur të përcaktojë me saktësi se sa ndikuan argumentet e Netanyahut në vendimin e Trumpit, por burimet thonë se telefonata dhe informacioni i inteligjencës për një mundësi të shkurtër për të goditur liderin iranian ishin faktorë kyç që e shtynë presidentin amerikan të jepte urdhrin për operacionin ushtarak më 27 shkurt, të quajtur “Operation Epic Fury”.
Sipas Netanyahut, eliminimi i lidershipit iranian mund të ndryshonte historinë dhe të çonte madje në një kryengritje popullore në Iran kundër sistemit teokratik që qeveris vendin që prej vitit 1979.
Bombardimet e para nisën në mëngjesin e së shtunës, më 28 shkurt, ndërsa po atë mbrëmje Trump njoftoi se Ali Khamenei kishte vdekur.
