Një avion evakuimi i organizuar nga qeveria franceze është detyruar të kthehet mbrapsht gjatë fluturimit për shkak të lëshimit të raketave në rajon. Lajmi u konfirmua nga ministri francez i Transportit, Philippe Tabarot.
Sipas tij, bëhet fjalë për një avion të kompanisë Air France të marrë me qira nga qeveria franceze për të riatdhesuar qytetarë francezë që ndodheshin në Emiratet e Bashkuara Arabe. Fluturimi ishte nisur për të marrë shtetasit francezë në zonën e Gjirit, por gjatë operacionit u detyrua të kthehej për arsye sigurie.
“Një avion Air France i marrë me qira nga qeveria për të kthyer në Francë bashkëkombasit tanë që ndodheshin në Emiratet e Bashkuara Arabe është detyruar këtë mbrëmje të kthehet mbrapsht për shkak të lëshimit të raketave në zonë”, deklaroi Tabarot.
Ngjarja vjen në një moment kur tensionet në Lindjen e Mesme janë përshkallëzuar ndjeshëm, me sulme me raketa dhe dronë në disa vende të rajonit, duke detyruar shtete të ndryshme të organizojnë operacione evakuimi për qytetarët e tyre.
