Pak ditë pasi ushtria amerikane e rrëzoi nga pushteti presidentin e Venezuelës, Nicolas Maduro, presidenti i SHBA, Donald Trump, ka lëshuar të tjera deklarata lidhur me ishullin danez të Groenlandës.
Presidenti amerikan ka thënë vazhdimisht se SHBA ka nevojë që Groenlanda të jetë pjesë e saj dhe madje nuk e ka përjashtuar as mundësinë që ta marrë këtë ishull me forcë.
Por pse Groenlanda? Faqja analitike "Osservatorio Geopolitico" që merren me studimin dhe monitorimin e zhvillimeve gjeopolitike, i ka dhënë një përgjigje më të qartë kësaj pyetjeje.
Sepse Moska ka vendosur pothuajse të gjitha asetet e saj strategjike ushtarake në Gadishullin Kolë, pranë Finlandës. Atje ndodhen silosat ruse të raketave balistike me rreze të gjatë (ICBM), bazat e nëndetëseve dhe bombarduesit strategjikë.
Nëse shikoni rrugën e fluturimit të këtyre raketave drejt pjesës më të madhe të SHBA-së kontinentale, ato kalojnë mbi Groenlandë. Pra, Groenlanda është teatri kryesor ku kontestohet çdo shkëmbim strategjik mes Uashingtonit dhe Moskës.
Për të kapur një raketë balistike, pika më e mirë është në apogee, në krye të rrugës së saj. Rruga më e shkurtër për një interceptor për të arritur në këtë pikë kalon pikërisht mbi Groenlandë. Kjo është arsyeja pse administrata Trump e konsideron vendin kaq të rëndësishëm për sigurinë kombëtare.
Një zhvillim tjetër i rëndësishëm është hapja e Kalimit Verior përmes Arktikut. Së shpejti, anijet e mallrave të Kinës do të lundrojnë përmes këtij korridori drejt Roterdamit, duke shmangur Suezin dhe kufizimet e madhësisë së anijeve Suezmax. Kjo do të përshpejtojë ndjeshëm tregtinë midis Kinës dhe BE-së. Në të njëjtën kohë, nëndetëset kineze mund të operojnë nën Arktik drejt Atlantikut Verior, nëse nuk e bëjnë tashmë.
Për këtë arsye, bregdeti veri-lindor i Groenlandës ka dy objektiva kritike për sigurinë kombëtare të SHBA-së, mbikëqyrjen e raketave ruse dhe kontrollin e rrugës së re të transportit arktik.
Në fund, është e rëndësishme të kuptohet se harta globale Mercator nuk pasqyron saktë pozicionin real të vendeve. Kushdo që mendon se ka “arsye sekrete” të tjera për interesin e Trump ndaj Groenlandës, thjesht nuk e kupton strategjinë globale.
