Të paktën shtatë efektivë policie janë plagosur në Torino pas përplasjeve të dhunshme mes forcave të rendit dhe protestuesve gjatë një marshimi kundër mbylljes së qendrës sociale Askatasuna.
Sipas policisë së Torinos, efektivët e njësive të ndërhyrjes janë goditur me mjete të forta gjatë incidenteve të regjistruara në rrugët e qytetit. Protesta nisi si marshim kundër vendimit të qeverisë për mbylljen e qendrës, por më pas degjeneroi në përleshje me policinë.
Autoritetet italiane kanë justifikuar mbylljen e Askatasuna-s me argumentin e luftës ndaj ekstremizmit. Qendra funksiononte prej vitesh në një godinë të okupuar pa leje ligjore dhe shërbente si hapësirë për protesta, aktivitete kulturore dhe iniciativa sociale.
Aktivistët e Askatasuna-s janë përfshirë shpesh në përplasje me autoritetet, duke kundërshtuar ndërhyrjet policore dhe vendimet për dëbim. Vendimi i fundit për mbylljen e saj ka shkaktuar reagime të forta nga organizata dhe lëvizje të majta, të cilat e konsiderojnë ndërhyrjen si represion politik.
Situata në Torino mbetet e tensionuar, ndërsa autoritetet po hetojnë incidentet dhe përgjegjësit për dhunën gjatë protestës.
