Prokurorët e Utah kanë ngritur zyrtarisht akuza për vrasje të rënduar ndaj 22-vjeçarit Tyler Robinson, i dyshuar si autor i atentatit ndaj aktivistit konservator Charlie Kirk. Robinson akuzohet se qëlloi me pushkë nga një çati në kampusin e Universitetit të Utah Valley javën e kaluar, duke i shkaktuar vdekjen Kirk-ut.
Prokurori i Qarkut Utah, Jeffrey Gray, tha se janë ngritur gjithsej shtatë akuza, përfshirë pengim të drejtësisë dhe manipulim dëshmitarësh, pasi Robinson i kishte kërkuar shokut të dhomës të fshinte mesazhet. Gray konfirmoi se zyra e tij do të kërkojë dënim me vdekje, vendim që e mori “në mënyrë të pavarur, bazuar vetëm në provat dhe rrethanat e krimit”.
Vrasja, e regjistruar në video të shpërndara gjerësisht në internet, ka nxitur dënime të dhunës politike nga të gjitha kampet, por gjithashtu edhe akuza të ndërsjella politike. Autoritetet ende nuk kanë bërë publike një motiv, ndërsa mbështetësit e Kirk e kanë cilësuar atë si “martir të kauzës së tyre”.
