Prokuroria e Përgjithshme e Stambollit ka lëshuar këtë të premte urdhra arresti për kryeministrin izraelit Benjamin Netanyahu dhe 36 zyrtarë të tjerë të lartë të shtetit të Izraelit, nën akuzën për “gjenocid dhe krime kundër njerëzimit”, në lidhje me operacionet ushtarake të ndërmarra në Rripin e Gazës që prej tetorit të vitit 2023.
Sipas njoftimit zyrtar, në listën e personave ndaj të cilëve janë lëshuar urdhër-arreste përfshihen ministri i Mbrojtjes Israel Katz, ministri i Sigurisë Kombëtare Itamar Ben Gvir, ministri i Kufijve dhe Sigurisë Eyal Zamir, si dhe komandanti i Forcave Detare, David Saar Salama.
Hetimi i zhvilluar nga autoritetet turke fokusohet në aktet që Prokuroria i cilëson si “dhunë sistematike dhe të qëllimshme ndaj civilëve palestinezë” në territorin e Gazës. Në dosjen hetimore përmenden një sërë ngjarjesh të rënda, përfshirë sulmin ndaj Spitalit Al-Ahli Baptist më 17 tetor 2023, si dhe dëmtimin e Spitalit Ebli Baptist më 21 tetor 2023, të cilat shkaktuan dhjetëra viktima mes civilëve.
Gjithashtu, një ndër pikat kyçe të akuzës është edhe vrasja e punonjësve të organizatës humanitare “World Central Kitchen” më 1 prill 2024, gjatë misioneve të ndihmës në Gaza. Sipas Prokurorisë, forcat izraelite kanë targetuar qëllimisht personelin civil dhe infrastrukturën e domosdoshme për mbijetesën e popullsisë, duke përfshirë bllokimin e ndihmave humanitare dhe kufizimin e aksesit në shërbime mjekësore thelbësore.
Në dokumentin hetimor janë përfshirë edhe deklarata të lëshuara nga organizata “Sumud Flotilla”, e cila kishte tentuar të dërgonte ndihma humanitare në Gaza përmes rrugëve detare. Hetimi u hap pas disa ankesave të paraqitura në gjykatat e Stambollit më 4, 7, 9 dhe 10 tetor 2025, dhe është zhvilluar në bashkëpunim me Ministrinë e Drejtësisë dhe Ministrinë e Punëve të Jashtme të Turqisë.
Prokuroria theksoi se urdhrat e arrestit janë lëshuar në përputhje me procedurat ligjore ndërkombëtare dhe kombëtare në fuqi, duke nënvizuar se akuzat përfshijnë “veprime që përbëjnë krime kundër njerëzimit dhe kërkojnë hetim të vazhdueshëm dhe ndëshkim penal të përgjegjësve”.
Turqia ka qenë ndër vendet që kanë mbajtur një qëndrim kritik dhe të ashpër ndaj fushatës ushtarake të Izraelit në Gaza, e cila filloi pas sulmeve të Hamasit në jug të Izraelit në tetor 2023. Si pasojë e përshkallëzimit të konfliktit dhe rritjes së numrit të viktimave civile palestineze, Ankara ka pezulluar marrëdhëniet diplomatike dhe tregtare me Izraelin, duke kërkuar vazhdimisht hetim ndërkombëtar për krimet e kryera ndaj popullatës së Gazës.
