Presidentja e Kosovës, Vjosa Osmani, ka reaguar ndaj deklaratave të fundit të presidentit serb, Aleksandar Vuçiç, i cili tha se “bota po shkon drejt një konflikti të madh” dhe se “të gjithë po përgatiten për luftë”.
Osmani i quajti këto deklarata thirrje të rrezikshme që kujtojnë kapitujt më të errët të historisë. Ajo tha se, ashtu si në vitet '90 me Millosheviçin, edhe sot Serbia po përdor propagandën dhe retorikën e urrejtjes për të destabilizuar rajonin.
“Vuçiçi nuk ka zgjedhur rrugën e pajtimit, por po ringjall fantazitë shkatërruese të së kaluarës. Historia ka treguar që ato përfundojnë me dështim,” shkroi Osmani në platformën X.
Presidentja theksoi se Kosova ka zgjedhur paqen dhe se do ta mbrojë me çdo kusht. Ajo shtoi se, ndryshe nga Serbia, Kosova mbetet e përkushtuar ndaj dialogut dhe stabilitetit në rajon.
Deklaratat e Vuçiçit erdhën gjatë Samitit të Komunitetit Politik Evropian në Kopenhagë, ku ai foli për përgatitjet e vendeve për luftë, pa dhënë ndonjë provë konkrete për pretendimet e tij.
