Sipas mediave ndërkombëtare, Shtetet e Bashkuara po planifikojnë ndërtimin e rreth 25 mijë banesave në anën izraelite të Gazës, në kuadër të një projekti të quajtur “Komunitete të Sigurta Alternative”. Projekti, që pritet të ndërtohet në toka me pronësi palestineze, ka ngjallur kritika pasi mund të forcojë ndarjen e përhershme të Gazës në dy zona — një nën kontrollin izraelit dhe një tjetër të Hamasit.
Ndërkohë, Knesset-i izraelit ka miratuar në lexim të parë ligjin për dënimin me vdekje të terroristëve, të cilin Hamasi e ka cilësuar si “akt racist dhe kriminal” dhe ka kërkuar ndërhyrjen e komunitetit ndërkombëtar.
Lëvizja Houthi në Jemen ka njoftuar ndalimin e sulmeve kundër Izraelit dhe anijeve në Detin e Kuq, për shkak të armëpushimit në Gaza, por ka paralajmëruar se do t’i rifillojë nëse Izraeli rinis ofensivën.
Sipas burimeve izraelite, SHBA-të po planifikojnë gjithashtu ngritjen e një baze të madhe ushtarake në Izrael, pranë kufirit me Gazën, për të strehuar forcat ndërkombëtare që do të monitorojnë armëpushimin. Kjo bazë mund të kushtojë rreth 500 milionë dollarë dhe shënon një përfshirje më të drejtpërdrejtë të Uashingtonit në konflikt.
Në terren, rreziku i ndarjes de facto të Gazës është gjithnjë e më i dukshëm, ndërsa rindërtimi i zonës duket se do të kufizohet vetëm në pjesën e kontrolluar nga Izraeli.
Në një zhvillim tjetër rajonal, ushtria libaneze ka forcuar praninë në kufirin me Sirinë pas përleshjeve midis forcave siriane dhe militantëve të ISIS-it. Ndërkohë, në Siri, presidenti i përkohshëm Ahmad Sharaa, ish-anëtar i Al-Kaedës, është pritur në Shtëpinë e Bardhë nga Donald Trump, duke shënuar afrimin e SHBA-së me Damaskun në kuadër të “luftës kundër terrorizmit”.
