Pesë miliardë dollarë në një ditë të vetme, dhe e gjitha falë një kriptomonedhe të re.
Këtë javë, pasuria e familjes Trump është rritur ndjeshëm, duke tejkaluar fitimet e dekadave nga investimet në pasuri të paluajtshme. Arsyeja është debutimi i kriptomonedhës WLFI, e cila u lançua të hënën, më 1 shtator, nga Eric dhe Donald Trump Jr., djemtë e presidentit amerikan, ndërsa Donald Trump konsiderohet “bashkëthemelues emeritus”. Emri i tokenit WLFI lidhet me platformën e decentralizuar tregtare World Liberty Financial, e cila synon të sjellë një qasje të re në tregtimin e aseteve dixhitale.
Investitorët e parë të tokenëve kishin dhënë miratimin që në korrik për tregtimin e monedhës, duke hapur kështu mundësinë e përdorimit të aseteve që më parë kishin mbetur të bllokuara në portofolët dixhitalë të blerësve fillestarë. Megjithatë, rregullat e brendshme të projektit parashikojnë që investitorët të mos mund të shesin më shumë se 20% të zotërimeve të tyre në tokenë në fazën fillestare.
Sipas të dhënave të publikuara, portofoli i familjes Trump përmban mbi një të katërtën e totalit të tokenëve, rreth 16 miliardë WLFI, dhe vetëm gjatë ditës së hënës kjo pjesëmarrje ka ndihmuar në rritjen e kapitalit të tyre me 5 miliardë dollarë. Monedha digjitale u lançua fillimisht me një çmim prej 30 centësh, ndërsa investitorët e hershëm e kishin blerë për vetëm 1.5 cent. Gjatë ditës së hapjes, çmimi pësoi rënie në 20 cent, ndërkohë që sipas platformës CoinMarketCap, në ditën e parë u tregtua një volum prej 1 miliard dollarësh në WLFI.
Donald Trump ka shprehur publikisht interesin e tij për botën e kriptomonedhave, kryesisht nën ndikimin e fëmijëve të tij, të cilët e kanë këshilluar dhe orientuar në këtë drejtim. Në një takim virtual, ai deklaroi se Eric, Don Jr. dhe Barron janë shumë të njohur me tregun e kriptomonedhave dhe menaxhimin e portofolëve dixhitalë.
WLFI nuk është përpjekja e parë e familjes Trump në këtë sektor. Në janar të këtij viti, ish-presidenti amerikan lançoi tokenin $TRUMP, një memecoin, ndërsa më pas u prezantua edhe tokeni $Melania, i dedikuar bashkëshortes së tij, Melania Trump. Këto iniciativa synojnë jo vetëm përfitime financiare, por edhe forcimin e pranisë së markës Trump në botën gjithnjë e më influente të financave digjitale.
Me rritjen marramendëse të vlerës së WLFI në debutim, pasuria e familjes Trump ka marrë një shtysë historike, duke e konsoliduar pozicionin e saj si një nga familjet më të pasura dhe më me ndikim në tregun e ri të aseteve digjitale.
