Lufta mes Shteteve e Bashkuara të Amerikës, Izraelit dhe Iranit ka hyrë në ditën e tretë, duke u përshkallëzuar më tej gjatë natës me përhapjen e përplasjeve edhe në territorin e Libanit. Situata në rajon mbetet tepër e tensionuar, ndërsa raportohen viktima të shumta dhe sulme të njëpasnjëshme në disa fronte.
Izraeli dhe grupi militant Hezbollah shkëmbyen zjarr, me shpërthime të raportuara në jug të kryeqytetit Bejrut. Autoritetet izraelite urdhëruan evakuimin e banorëve të mbi 50 qyteteve dhe fshatrave në Liban, duke paralajmëruar sulme të afërta ndaj objektivave që i konsiderojnë baza të Hezbollahut.
Presidenti amerikan, Donald Trump, deklaroi përmes një video-mesazhi se “operacionet luftarake” kundër Iranit do të vazhdojnë “derisa të arrihen të gjitha objektivat tona”, duke paralajmëruar gjithashtu mundësinë e viktimave të tjera amerikane. Komanda Qendrore e SHBA-së konfirmoi se tre ushtarakë amerikanë janë vrarë dhe pesë të tjerë janë plagosur rëndë si pasojë e një sulmi iranian.
Në Izrael, raketat iraniane goditën qytetin Beit Shemesh, duke shkaktuar të paktën nëntë viktima, sipas shërbimit të ambulancës Magen David Adom. Ky konsiderohet si sulmi më vdekjeprurës ndaj Izraelit që nga nisja e konfliktit aktual. Në orët e para të së hënës, Izraeli ndërmori sulme ajrore ndaj objektivave që i cilësoi si të Hezbollahut në Liban, pasi grupi kishte lëshuar raketa drejt territorit izraelit. Ndërkohë, zyrtarët iranianë raportuan se të paktën 153 persona humbën jetën pas një sulmi në një shkollë vajzash. Presidenti i Iranit, Masoud Pezeshkian, e cilësoi ngjarjen si një “akt barbar”.
Tensionet janë përhapur edhe në vende të tjera të rajonit. Emiratet e Bashkuara Arabe njoftuan se tre persona janë vrarë që nga e shtuna në sulmet hakmarrëse të Iranit. Shpërthime janë raportuar gjithashtu në Bahrein, në qytetin irakian Erbil si dhe në Jordani.
Ndërkohë, përshkallëzimi i konfliktit ka ndikuar menjëherë në tregjet globale, ku çmimet e naftës shënuan rritje të ndjeshme me hapjen e tregjeve aziatike të hënën në mëngjes, duke shtuar frikën për pasoja të gjera ekonomike në nivel ndërkombëtar.
