Sipas vlerësimeve të OKB-së, mbi 650,000 persona ende qëndrojnë në Qytetin e Gazës, ndërkohë që Izraeli po përshkallëzon ofensivën e tij ushtarake.
Mediat ndërkombëtare raportojnë se mijëra palestinezë po vazhdojnë të largohen nga qyteti, teksa Izraeli hyn në ditën e dytë të ofensivës së tij të gjerë tokësore, me synimin për të marrë kontrollin e plotë të zonës.
Sipas autoriteteve izraelite, qëllimi i këtij operacioni është lirimi i pengjeve të mbajtura nga Hamasi dhe shkatërrimi i deri në 3,000 luftëtarëve të grupit, në atë që ata e quajnë "bastioni i fundit" i Hamasit. Megjithatë, kjo ndërhyrje ka nxitur dënime të shumta në arenën ndërkombëtare.
Udhëheqësit e mbi 20 organizatave të mëdha humanitare, përfshirë Save the Children dhe Oxfam, kanë paralajmëruar se "situata ç’njerëzore në Gaza është e papranueshme".
Këto zhvillime vijnë vetëm një ditë pasi një komision hetimor i Kombeve të Bashkuara konkludoi se Izraeli ka kryer akte të gjenocidit ndaj palestinezëve në Gaza – një akuzë që autoritetet izraelite e kanë mohuar kategorikisht.
Në mes të bombardimeve intensive nga Izraeli, Ministria e Shëndetësisë në Gaza, e kontrolluar nga Hamasi, deklaroi se spitali pediatrik al-Rantisi në Qytetin e Gazës u godit tri herë të martën në mbrëmje. Si pasojë, rreth gjysma e pacientëve janë larguar nga objekti.
Një burim në spital konfirmoi se nuk ka pasur të lënduar, por dëmet materiale janë të konsiderueshme – duke përfshirë sistemet e ajrit të kondicionuar, rezervuarët e ujit dhe panelet diellore.
“Ky është i vetmi spital i specializuar për trajtimin e fëmijëve me kancer, probleme renale dhe sëmundje të tjera të rënda”, tha Fikr Shalltoot, drejtor i organizatës humanitare “Ndihmë Mjekësore për Palestinezët”.
Ndërkohë, Forcat Mbrojtëse të Izraelit (IDF) njoftuan se janë duke shqyrtuar raportet lidhur me sulmin ndaj spitalit.
