Për herë të parë në më shumë se dy dekada matjesh, shumica relative e amerikanëve shprehin më shumë simpati për palestinezët sesa për Izraelin në konfliktin mes tyre. Kështu rezulton nga një sondazh i publikuar nga kompania amerikane e matjeve të opinionit Gallup.
Sipas të dhënave, 41 për qind e të anketuarve deklarojnë se simpatizojnë më shumë me palestinezët, ndërsa 36 për qind me Izraelin. Pjesa tjetër janë të pavendosur ose shprehen se mbështesin të dyja palët apo asnjërën.
Ky është ndryshimi i parë që nga momenti kur Gallup nisi ta bëjë këtë pyetje, mbi 20 vite më parë, ku Izraeli nuk rezulton më në krye të simpative të publikut amerikan. Vetëm një vit më parë, Izraeli kryesonte me 46 për qind kundrejt 33 për qind për palestinezët.
Sondazhi tregon ndarje të forta politike. 65 për qind e demokratëve shprehen në krah të palestinezëve, ndërsa vetëm 17 për qind me Izraelin. Në krahun tjetër, 70 për qind e republikanëve mbështesin Izraelin, megjithëse kjo përqindje ka rënë me rreth 10 pikë përqindjeje gjatë dekadës së fundit. Të pavarurit anojnë drejt palestinezëve me një diferencë prej 11 pikësh përqindjeje.
Ndryshimi i qëndrimeve vjen në një moment kur lufta në Gaza dhe politikat e qeverisë së Benjamin Netanyahu kanë thelluar debatet brenda SHBA-së, përfshirë kritika ndaj administratave të fundit për mënyrën e menaxhimit të marrëdhënieve me Izraelin.
Sondazhi është realizuar me 1,001 të rritur amerikanë, përmes intervistave telefonike, në periudhën 2–16 shkurt.
