Sekretari amerikan i Mbrojtjes, Pete Hegseth, ka larguar nga detyra shefin e Agjencisë së Inteligjencës së Pentagonit, vetëm disa javë pasi pati një përplasje me Shtëpinë e Bardhë lidhur me një raport mbi sulmet amerikane ndaj Iranit, njofton BBC.
Gjenerali i lartë Jeffery Kruse nuk do të drejtojë më Agjencinë e Inteligjencës së Mbrojtjes (DIA), ndërsa dy komandantë të tjerë të rangut të lartë ushtarak janë gjithashtu larguar nga postet e tyre në Pentagon, sipas burimeve të brendshme.
Departamenti i Mbrojtjes nuk ka dhënë ende një sqarim zyrtar në lidhje me këto shkarkime.
Në qershor, presidenti Donald Trump kishte kundërshtuar ashpër një raport të DIA-së, i cili u bë publik në media dhe që tregonte se sulmet ndaj Iranit kishin vetëm vonuar përkohësisht përparimin e programit bërthamor iranian për disa muaj. Shtëpia e Bardhë e kishte cilësuar raportin si “krejtësisht të pasaktë”.
Trump deklaroi se objektet bërthamore iraniane ishin “shkatërruar plotësisht” dhe akuzoi mediat për përpjekje për të minuar njërën prej operacioneve ushtarake më të suksesshme në histori.
