Qeveria e Zvicrës ka vendosur me efekt të menjëhershëm ngrirjen e aseteve të mbajtura nga presidenti i Venezuelës, Nicolás Maduro, si dhe personave të tjerë të lidhur me të. Sipas autoriteteve zvicerane, kjo masë ka për qëllim të parandalojë largimin e këtyre pasurive nga vendi dhe, nëse procedurat ligjore të ardhshme konfirmojnë se ato janë fituar në mënyrë të paligjshme, asetet do t’i rikthehen popullit venezuelian.
Zvicra ka vendosur sanksione ndaj Venezuelës që nga viti 2018, duke përfshirë ngrirjen e aseteve dhe ndalime udhëtimi për 54 individë të përfshirë në strukturat qeveritare. Nuk është bërë e ditur saktësisht natyra e pasurive që mban Maduro në Zvicër, por një raport i vitit 2021, bazuar në dokumente të rrjedhura, sugjeronte se prokurorët zviceranë kishin identifikuar llogari bankare me vlerë rreth 10 miliardë dollarë, të cilat mund të kenë rrjedhur nga fonde publike të përvetësuara në Venezuelë.
Ngrirja e aseteve hyn në fuqi menjëherë dhe do të mbetet e vlefshme për katër vjet, derisa të njoftohet ndryshe nga autoritetet zvicerane.
