Presidenti i SHBA, Donald Trump, i tha Fox News se e pa kapjen brenda natës të Presidentit Venezuelan Nicolás Maduro dhe gruas së tij sikur po ndiqte “një shfaqje televizive”.
“Nëse do ta kishit parë shpejtësinë, dhunën, do të ishte një gjë e mahnitshme”, u shpreh Trump.
Ai e vlerësoi ekipin e tij për “një punë të jashtëzakonshme” dhe shtoi se “nuk ka asnjë vend tjetër në tokë që mund të bëjë një manovër të tillë”.
Trump gjithashtu ka deklaruar se ka folur me Nicolas Maduron një javë më parë duke e udhëzuar të dorëzohet.
“Na u desh të bënim diçka shumë më kirurgjikale, shumë më të fuqishme”, tha Trump.
“Ne do ta bënim këtë katër ditë më parë, por moti nuk ishte perfekt”, shtoi Trump, ndërsa zbuloi se kur e kapën Maduron, ai ishte “në një shtëpi që ishte më shumë si një fortesë sesa një shtëpi” me “çelik të fortë përreth”.
