Papa Leo deklaroi se do të vazhdojë reformat më të rëndësishme të nisura nga Papa Françesku, përfshirë përqafimin e komunitetit LGBT brenda Kishës, diskutimin mbi shugurimin e grave dhe mbajtjen e marrëveshjes me Kinën për emërimin e ipeshkvijve. Megjithatë, ai theksoi se nuk parashikon ndryshime të mëdha në doktrinën e Kishës Katolike.
Në intervistën e tij të parë zyrtare, të publikuar të enjten, Papa Leo – i cili u zgjodh në maj si papa i parë amerikan në histori – theksoi një qasje më të matur dhe të rezervuar krahasuar me paraardhësin e tij, duke shmangur deklarata të forta mbi çështje politike dhe gjeopolitike.
Qasje e kujdesshme ndaj politikës amerikane dhe krizës në Gazë
Ndryshe nga Papa Françesku, i cili nuk hezitoi të kritikonte drejtpërdrejt Presidentin Donald Trump dhe veprimet e Izraelit në Gaza, Papa Leo u tregua i matur. Ai nuk e përmendi Trump me emër në kontekst negativ dhe refuzoi të etiketon veprimet izraelite si "gjenocid".
"Unë nuk kam ndërmend të përfshihem në politikën partizane," u shpreh ai. "Ka shumë çështje të rëndësishme që meritojnë vëmendje, por do të ishte e pamundur për papën të ndërhyjë në çdo vend veçmas."
Megjithatë, Papa Leo shprehu "shqetësim të thellë" për situatën humanitare në Gazë, duke pranuar se termi "gjenocid" po përdoret gjithnjë e më shumë, por shtoi se Selia e Shenjtë nuk është në pozicion të bëjë një deklaratë të tillë në këtë fazë.
Ai gjithashtu bëri të ditur se nuk ka pasur ende një komunikim me Presidentin Trump, por ka diskutuar mbi çështjet e migracionit gjatë një takimi me Zëvendëspresidentin amerikan JD Vance, në muajin maj. "Fola për dinjitetin njerëzor, si një vlerë themelore për çdo individ, pavarësisht vendit të lindjes," theksoi ai.
Përballja me abuzimet dhe akuzat e rreme
Në vazhdën e krizave që kanë tronditur Kishën Katolike ndër vite, Papa Leo përsëriti dënimin e fortë të abuzimeve seksuale nga klerikët dhe mbështeti viktimat, por paralelisht shprehu shqetësim për rritjen e rasteve të akuzave të pabazuara ndaj priftërinjve, që sipas tij, mund të dëmtojnë padrejtësisht figura të pafajshme brenda Kishës.
Marrëveshja me Kinën do të vazhdojë
Duke komentuar marrëveshjen e arritur nga Papa Françesku me autoritetet kineze në vitin 2018, e cila i jep shtetit njëfarë ndikimi në emërimin e ipeshkvijve, Papa Leo u shpreh se nuk planifikon ndryshime të menjëhershme në këtë drejtim.
“Për momentin, do të vijojmë me politikën që Selia e Shenjtë ka ndjekur prej disa vitesh,” tha ai, duke theksuar se papa mban gjithsesi fjalën e fundit në procesin e emërimeve.
Reuters
