Një hetim i Reuters ka zbuluar se sulmi i 25 gushtit në Spitalin Nasser në Khan Younis, ku u vranë 22 persona mes tyre pesë gazetarë, nuk përputhet me shpjegimin zyrtar të ushtrisë izraelite.
Izraeli tha fillimisht se kishte goditur një “kamerë të Hamasit”. Por pamjet tregojnë se bëhej fjalë për një kamerë të Reuters, të përdorur prej kohësh nga gazetari Hussam al-Masri, i cili u vra në sulm. Ai shpesh e mbulonte kamerën me një qilim lutjeje për ta mbrojtur nga pluhuri e dielli.
Një zyrtar ushtarak izraelit ka pranuar për Reuters se ushtarët vepruan pa miratimin e komandantit rajonal, duke shkelur zinxhirin e komandës.
Pas sulmit, tanket izraelite goditën sërish shkallët e spitalit vetëm nëntë minuta më vonë, duke vrarë gazetarë e punonjës emergjence që kishin mbërritur në vend.
Kryeministri Benjamin Netanyahu e quajti ngjarjen një “gabim tragjik”, ndërsa zyrtarët e Hamasit e cilësuan një krim lufte kundër spitalit dhe gazetarëve.
Sipas Komitetit për Mbrojtjen e Gazetarëve (CPJ), që prej tetorit 2023 janë vrarë mbi 200 gazetarë dhe punonjës mediatikë në Gaza, Izrael dhe Liban. Deri tani, Izraeli nuk ka ofruar hetime të plota apo llogaridhënie për asnjë nga këto raste.
