Kryeministri hungarez Viktor Orbán ka dalë hapur kundër linjës së Bashkimit Europian për energjinë, duke deklaruar se Europa nuk mund ta përballojë krizën energjetike pa naftën ruse me kosto të ulët.
Deklarata e tij vjen në një moment kur në Bruksel po diskutohet mundësia e rikthimit të masave të kursimit të energjisë të miratuara në vitin 2022, të cilat parashikojnë që vendet e BE-së të ulin me 15% konsumin e gazit krahasuar me mesataren e pesë viteve të fundit.
Komisioni Europian thekson se këto janë masa emergjente që mund të aktivizohen në rast të një krize të re energjetike, veçanërisht nëse lufta në Gjirin Persik vazhdon dhe çmimet e naftës dhe gazit rriten ndjeshëm. Në skenarët më pesimistë, nafta mund të arrijë deri në 200 dollarë për fuçi, ndërsa gazi të thyejë rekordet e fundit.
Ndërkohë, Orbán ka kritikuar hapur sanksionet ndaj Rusisë dhe ka deklaruar se Europa nuk mund ta zgjidhë krizën energjetike duke u shkëputur nga furnizimet ruse. “Është koha të refuzojmë shantazhin ukrainas”, ka thënë ai, duke paralajmëruar se Hungaria do të vazhdojë të mbrojë interesat e saj energjetike.
Në këtë klimë tensioni, ministrat e Energjisë të BE-së dhe të G7 do të zhvillojnë një takim urgjent për të diskutuar situatën, ndërsa kriza energjetike po kthehet sërish në një nga sfidat më të mëdha për Europën.
