Organizata Botërore e Shëndetësisë (OBSH) ka ngritur alarmin për përshkallëzimin e situatës, duke theksuar rreziqet që lidhen me goditjet në afërsi të infrastrukturës bërthamore. Sipas OBSH-së, këto sulme përbëjnë një kërcënim në rritje për shëndetin publik dhe sigurinë mjedisore në rajon dhe më gjerë.
Drejtori i Përgjithshëm i OBSH-së, Tedros Adhanom Ghebreyesus, reagoi përmes një deklarate në platformën X, ku theksoi se çdo përshkallëzim pranë objekteve të tilla mund të ketë pasoja të paparashikueshme dhe potencialisht katastrofike.
Ai u bëri thirrje të gjitha palëve të përfshira në konflikt që, si çështje urgjente, të tregojnë përmbajtje maksimale ushtarake dhe të shmangin çdo veprim që mund të provokojë një incident bërthamor.
Paralajmërimi i OBSH-së vjen në një moment tensioni të lartë në rajon, duke theksuar nevojën për kujdes të shtuar ndërkombëtar dhe përpjekje për të shmangur një krizë me pasoja globale.
