Kanë nisur punimet e Bordit të Paqes në Washington, ndërsa ceremonia nisi me foton familjare të liderëve të shteteve që kanë pranuar të jenë pjesë e tij. Mes 40 liderëve të botës ishin edhe kryeministri Edi Rama dhe presidentja e Kosovës, Vjosa Osmani.
Teksa mbajti fjalën e tij në takimin e parë, presidenti i SHBA-së, Donald Trump, e përshkroi Bordin e Paqes si një projekt të madh dhe të jashtëzakonshëm, që u arrit të realizohej brenda një viti.
Duke falënderuar vendet pjesëmarrëse në Bordin e Paqes, ai theksoi se Shqipëria dhe Kosova kanë premtuar se do të angazhohen me trupa ushtarake në Rripin e Gazës. Po ashtu, ai bëri me dije se SHBA-ja do të japë 10 miliardë dollarë kontribut për Bordin e Paqes.
Ai tha se Bordi i Paqes është një fjalë e lehtë për t’u thënë, por paqja është e vështirë për t’u provuar.
Presidenti i SHBA-së nuk la pa thumbuar edhe liderët botërorë që refuzuan të bëhen pjesë e këtij bordi, duke thënë se disa bëjnë naze dhe disa të tjerë nuk do t’u pëlqente të ishin pjesë, sepse janë telash.
Numri një i Amerikës vijoi më tej duke kujtuar se si arriti të pushonte disa prej luftërave, tetë prej tyre, tha ai, që bëheshin prej vitesh, madje disa prej tyre me mbi 30 vite luftime. Ai përsëriti se ka luajtur një rol në ndalimin e një lufte mes Kosovës dhe Serbisë.
Trump iu drejtua Osmanit duke i thënë se është bërë një punë e jashtëzakonshme, ndërsa shtoi se, nëse do të ketë probleme në të ardhmen, ata duhet thjesht ta telefonojnë atë.
