Kryeministri izraelit Benjamin Netanyahu deklaroi se liderët e Hamasit “nuk do të kenë imunitet, kudo që ndodhen”, duke mos përjashtuar goditje të tjera pas sulmit të javës së kaluar në Katar. Ai foli në një konferencë të përbashkët me Sekretarin amerikan të Shtetit Marco Rubio, duke theksuar se “çdo vend ka të drejtë të mbrohet edhe përtej kufijve të tij”.
Sulmi ndaj Hamasit në Katar – një aleat i ngushtë i SHBA – shkaktoi zemërim ndërkombëtar dhe kritika nga presidenti amerikan Donald Trump, i cili më herët kishte siguruar Katarin se “një gjë e tillë nuk do të përsëritej në tokën e tyre”. Netanyahu tha se operacioni ishte kryer vetëm nga Izraeli, pa përfshirjen e SHBA.
Ndërkohë, ushtria izraelite ka vazhduar ofensivën në Gaza, me shkatërrimin e banesave në qytetin e Gazës dhe paralajmërime për operacione tokësore në perëndim të qytetit. OKB ka paralajmëruar se intensifikimi i luftimeve në një zonë ku tashmë është shpallur uria do të çojë civilët drejt një “katastrofe edhe më të thellë”.
Takimi Netanyahu–Rubio u zhvillua në sfondin e një samiti arab në mbështetje të Katarit dhe pak ditë para Asamblesë së Përgjithshme të OKB, ku pritet që vende aleate të SHBA – përfshirë Britaninë, Francën, Kanadanë, Australinë e Belgjikën – të njohin shtetin e Palestinës. Kjo ka rritur debatet brenda Izraelit, ku krahu i djathtë kërkon aneksimin e plotë të Bregut Perëndimor.
Izraeli ka ndërtuar mbi 160 vendbanime me rreth 700 mijë hebrenj në tokat e pushtuara që nga viti 1967, ku sot jetojnë edhe rreth 3.3 milionë palestinezë. Vendbanimet konsiderohen të paligjshme sipas të drejtës ndërkombëtare.
