Kryeministri i Izraelit, Benjamin Netanyahu, deklaroi se bashkëpunimi ushtarak mes Izraelit dhe Shteteve të Bashkuara është “historik”, ndërsa ofensiva kundër Iranit dhe aleatëve të tij vazhdon.
Gjatë një vizite në një bazë të forcave ajrore në jug të vendit, Netanyahu tha se Izraeli po vazhdon goditjet ndaj objektivave iraniane dhe ndaj elementëve të lidhur me Hezbollah në Liban.
“Vazhdojmë të godasim objektivat e regjimit të terrorit në Iran dhe gjithashtu elementët terroristë në Liban. Bashkëpunimi mes ushtrisë amerikane dhe IDF-së është historik”, deklaroi ai.
Sipas kryeministrit izraelit, rezultatet e deritanishme janë të rëndësishme, por operacionet do të vazhdojnë. “Rezultatet janë domethënëse, por ka ende shumë punë për të bërë. Dua të falënderoj edhe një herë mikun tim, presidentin Donald Trump, për bashkëpunimin mes nesh dhe mes Izraelit dhe Shteteve të Bashkuara. Së bashku do të vazhdojmë dhe së bashku do t’i arrijmë objektivat tona, me ndihmën e Zotit”, shtoi Netanyahu.
Ndërkohë, presidenti amerikan Donald Trump deklaroi se amerikanët mbështesin veprimet ushtarake kundër Iranit dhe minimizoi shqetësimet për ndikimin e luftës në politikën e brendshme amerikane.
Në një intervistë për Politico, Trump tha se operacioni po eliminon një kërcënim të madh për SHBA. “Njerëzit e duan atë që po ndodh. Po eliminojmë një kërcënim për Shtetet e Bashkuara të Amerikës, një kërcënim të rëndësishëm, dhe po e bëjmë këtë si askush më parë”, u shpreh ai.
Trump hodhi poshtë gjithashtu idenë se rritja e çmimeve të karburantit për shkak të luftës me Iranin mund të dëmtojë republikanët në zgjedhjet e ardhshme të mesmandatit në SHBA.
