Liridon Kastrati, 32 vjeç, është shpallur fajtor për tentativë vrasjeje pasi u përplas me një patrullë policie dhe më pas ndoqi një oficer skocez duke mbajtur në dorë një sharrë elektrike.
Sipas provave të paraqitura në Gjykatën e Lartë të Paisley-t, gjithçka nisi kur automjeti Volkswagen i Kastratit goditi makinën e policisë. Pas përplasjes, ai u largua me vrap, por u rikthye te automjeti i tij, mori një sharrë elektrike dhe nisi të kërcënonte oficerin Cowan, të cilin e ndoqi në rrugë duke bërtitur.
Oficeri 35-vjeçar dëshmoi se ishte ndjerë në rrezik serioz, ndërsa Kastrati e përndiqte me mjetin elektrik në dorë. Ai u shpreh se në ato momente mendonte se jeta e tij ishte në rrezik.
Fillimisht, Kastrati mohoi akuzat për tentativë vrasjeje ndaj katër efektivëve, por gjykata e shpalli fajtor vetëm për një prej tyre. Ndërkohë, prokuroria tërhoqi akuzat për vjedhje automjeti, prishje të qetësisë publike dhe shkelje të rregullave të qarkullimit.
Mbrojtja deklaroi se hetimet kishin qenë të njëanshme dhe se Kastrati ishte marrë në pyetje pa avokat dhe pa përkthyes. Pas vendimit, gjykatësi Gallacher paralajmëroi një dënim të rëndë, duke e cilësuar ngjarjen “jashtëzakonisht të rrezikshme”.
