Aktori i njohur britanik Terence Stamp, një prej figurave më të spikatura të kinemasë, ka ndërruar jetë në moshën 87-vjeçare, ka bërë të ditur familja e tij përmes një deklarate të cituar nga “The Independent”.
Stamp u bë i famshëm për interpretimin e tij si gjenerali Zod, superkeqbërësi i filmave klasikë “Superman”, por karriera e tij përfshiu mbi 60 filma, duke lënë gjurmë edhe me role në produksione të suksesshme si “The Limey” dhe “The Adventures of Priscilla, Queen of the Desert”.
“Ai lë pas një vepër të jashtëzakonshme, si aktor dhe si shkrimtar, që do të vazhdojë të prekë dhe frymëzojë njerëzit për vite me radhë,” tha familja e aktorit në njoftimin e saj.
I nominuar për çmimin Oscar, Stamp u lind në East End të Londrës në vitin 1938, bir i një punëtori rimorkiatorësh. Ai i mbijetoi bombardimeve gjatë Luftës së Dytë Botërore dhe, menjëherë pas përfundimit të shkollës, filloi një karrierë në fushën e reklamave, përpara se të hynte në botën e aktrimit, ku do të ndërtonte një prej karrierave më të njohura në kinemanë britanike dhe botërore.
