Sekretari i Përgjithshëm i NATO-s, Mark Rutte, ka reaguar ashpër pas incidentit të fundit ku disa dronë rusë shkelën hapësirën ajrore të Polonisë, duke e cilësuar veprimin si një “sjellje të pamatur”, pavarësisht nëse ishte apo jo e qëllimshme nga ana e Moskës.
Në një deklaratë zyrtare nga selia e NATO-s, Rutte konfirmoi se aleatët kanë shprehur solidaritet të plotë me Poloninë, ndërsa po zhvillohet një vlerësim i plotë i incidentit nga strukturat ushtarake të Aleancës. “Kjo është një shkelje serioze e hapësirës ajrore të një vendi anëtar dhe nuk do të tolerohet,” tha ai.
Sipas Rutte, disa vende anëtare të NATO-s, përfshirë Holandën, Italinë, Poloninë dhe Gjermaninë, morën pjesë në operacionin për rrëzimin e dronëve rusë që depërtuan në territorin e Aleancës. Ky është një nga reagimet më të koordinuara ndërkombëtare ndaj një incidenti të tillë në vitet e fundit.
Incidenti ndodhi në kontekstin e një sulmi të madh ajror rus ndaj Ukrainës, ku gjatë natës Rusia ka lëshuar plot 415 dronë, disa prej të cilëve përfunduan në hapësirën ajrore të Polonisë.
Kryeministri polak, Donald Tusk, deklaroi se “Polonia është më afër një konflikti të hapur sesa ka qenë ndonjëherë që nga Lufta e Dytë Botërore”. Ai konfirmoi se katër nga nëntëmbëdhjetë dronët që shkelën hapësirën ajrore të Polonisë u rrëzuan nga avionë polakë dhe të NATO-s, duke shënuar kështu herën e parë që dronë rusë rrëzohen mbi territorin e një vendi anëtar të Aleancës.
Ngjarja ka rritur ndjeshëm tensionet në kufirin lindor të NATO-s dhe ka nxitur thirrje për forcim të mbrojtjes ajrore përgjatë krahut lindor të Aleancës. Vendet anëtare pritet të mblidhen në një takim urgjent të Këshillit të Atlantikut të Veriut për të diskutuar hapat e mëtejshëm.
