Tre avionë luftarakë rusë të tipit MiG-31 kanë shkelur hapësirën ajrore të Estonisë dhe janë interceptuar nga NATO, ka bërë të ditur aleanca ushtarake.
Ministria e Jashtme në Tallinn e cilësoi shkeljen si “të pacipë”, duke thënë se avionët hynë pa leje mbi Gjirin e Finlandës dhe qëndruan për 12 minuta në hapësirën e një vendi anëtar të NATO-s. Zëdhënësja e NATO-s, Allison Hart, deklaroi se reagimi ishte i menjëhershëm dhe e cilësoi ngjarjen si “një tjetër shembull të sjelljes së pamatur të Rusisë”.
Shefja e diplomacisë së BE-së, Kaja Kallas, e quajti incidentin “provokim jashtëzakonisht të rrezikshëm”, ndërsa ministri i Jashtëm estonez Margus Tsahkna tha se bëhej fjalë për një shkelje “pa precedent” dhe se Rusia vetëm në vitin 2025 e ka shkelur katër herë hapësirën ajrore të Estonisë.
Presidentja e Komisionit Europian, Ursula von der Leyen, paralajmëroi se BE do t’i përgjigjet çdo provokimi “me vendosmëri” dhe do të investojë më shumë në mbrojtjen e krahut lindor të aleancës.
