Ministri italian i Mbrojtjes, Guido Crosetto, ka mbetur i bllokuar në Dubai pas mbylljes së hapësirës ajrore në rajon, në kulmin e përshkallëzimit ushtarak mes SHBA-Izraelit dhe Iranit.
Sipas mediave italiane, Crosetto ishte nisur të premten nga Roma me një fluturim civil drejt Emirateve të Bashkuara Arabe për arsye personale, me synimin për t’u kthyer të dielën. Por përshkallëzimi i papritur i konfliktit dhe mbyllja e hapësirës ajrore në Iran, Irak dhe Izrael çoi në anulimin e dhjetëra fluturimeve, përfshirë edhe ato nga dhe drejt Dubait.
Mungesa e tij në Romë, në një moment kur po zhvilloheshin takime dhe kontakte institucionale mbi krizën, ka shkaktuar habi në qarqet qeveritare. Raportohet se edhe në nivel të lartë në Palazzo Chigi ka pasur surprizë për mungesën e ministrit në një nga mbledhjet.
Sipas informacioneve, shërbimi sekret italian për jashtë, AISE, nuk ishte në dijeni të udhëtimit të ministrit në Emirate – një element që ka shtuar polemikat, sidomos në një kontekst ku prej ditësh qarkullonin raporte inteligjence për rrezikun e një sulmi në zonën e Gjirit.
Çështja është kthyer shpejt në debat politik. Lëvizja 5 Yjet ka folur për “margjinalizim ndërkombëtar” të Italisë, ndërsa përfaqësues të partisë në pushtet Fratelli d’Italia i kanë quajtur akuzat spekulime politike.
Ndërkohë, autoritetet italiane po punojnë për kthimin e Crosettos në Itali. Sipas burimeve qeveritare, ai do të rikthehet me të njëjtat procedura si qytetarët e tjerë italianë të mbetur të bllokuar në Dubai.
