Guido Crosetto, ministër i Mbrojtjes i Italisë, ka njoftuar se po kthehet në Romë pasi mbeti i bllokuar në Dubai së bashku me familjen gjatë sulmeve të SHBA-së dhe Izraelit ndaj Iranit.
“Po kthehem në Itali”, shkroi ai në rrjetin social X, duke sqaruar se do të udhëtojë me një avion ushtarak, por me shpenzimet e veta. Sipas tij, pagesa do të jetë trefish më e lartë se tarifa e parashikuar për mysafirët në fluturimet shtetërore, për të shmangur çdo polemikë.
Megjithatë, polemikat nuk kanë munguar. Lëvizja 5 Yjet ka paralajmëruar një interpelancë parlamentare për rastin, ndërsa ish-gjenerali Roberto Vannacci ka ironizuar në rrjetet sociale. “Shpëtoni ushtarin Crosetto. Ka nisur operacioni special për ta nxjerrë Crosetto-n: i vetmi ministër i Mbrojtjes që shkon me pushime në një zonë lufte pa e ditur”, shkroi ai.
Crosetto ka bërë të ditur se do të kthehet i vetëm në Itali. “Për të shmangur ekspozimin ndaj rreziqeve të mëtejshme të personave të tjerë që mund të udhëtojnë me mua në kushtet aktuale”, theksoi ai, duke shtuar se familja e tij do të qëndrojë në Dubai, pasi është siguruar se nuk ka rreziqe të drejtpërdrejta për ta apo për qytetarët e tjerë italianë dhe të huaj, përveç rreziqeve të rastësishme.
Ministri theksoi se po vazhdon të punojë në koordinim me njësinë e krizës në Ministrinë e Jashtme italiane për të garantuar një zgjidhje të shpejtë dhe të sigurt për qytetarët.
