Plani i qeverisë së Giorgia Meloni për reformën e re në drejtësi po përballet me një goditje të fortë nga referendumi kushtetues, ku rezultatet e para tregojnë një avantazh të qartë për kampin e “Jo”.
Me 51% të seksioneve të numëruara, vota kundër reformës ka arritur në 54.57%, ndërsa pjesëmarrja në votim është afër 59%, një nivel i lartë për një referendum në Itali.
Rezultati konsiderohet një sinjal politik i fortë kundër ndryshimeve të propozuara në sistemin e drejtësisë, të cilat synonin riorganizimin e strukturave gjyqësore dhe raportit mes prokurorëve dhe gjyqtarëve.
Një nga kritikët më të zëshëm të reformës ka qenë prokurori i njohur antimafia Nicola Gratteri, i cili kishte paralajmëruar se ndryshimet e propozuara nuk do të zgjidhnin problemet reale të drejtësisë dhe mund të dobësonin luftën kundër krimit të organizuar.
Ndërkohë, opozita e ka përshëndetur rezultatin si një fitore politike dhe një mbrojtje të Kushtetutës, ndërsa kryeministrja Giorgia Meloni ka deklaruar se do të respektojë vendimin e qytetarëve dhe se qeveria do të vazhdojë punën pavarësisht rezultatit të referendumit.
