Autoritetet shëndetësore në Rripin e Gazës kanë njoftuar se të paktën 376 palestinezë janë vrarë dhe mbi 980 të tjerë janë plagosur që nga 10 tetori, data kur hyri në fuqi armëpushimi në enklavë. Njoftimi u bë publik të hënën nga Ministria e Shëndetësisë në Gaza, e cila theksoi se, pavarësisht ndërprerjes së luftimeve të drejtpërdrejta, situata humanitare vijon të jetë kritike.
Sipas të njëjtit raport, numri total i viktimave palestineze që nga nisja e ofensivës izraelite në tetor të vitit 2023 ka tejkaluar 70 mijë të vrarë, ndërsa mbi 171 mijë persona janë plagosur dhe kanë kërkuar trajtim mjekësor në kushte tejet të vështira për sistemin shëndetësor të enklavës.
Në një zhvillim paralel, televizioni “Al Arabiya” ka raportuar se lëvizja Hamas dhe ndërmjetësit ndërkombëtarë kanë rënë dakord për hapat e parë drejt çarmatimit të grupit. Sipas këtyre burimeve, procesi parashikon dorëzimin e armëve të rënda dhe nisjen e një etape politike drejt një marrëveshjeje afatgjatë paqeje. Po ashtu, thuhet se Hamas u ka konfirmuar Shteteve të Bashkuara gatishmërinë për të dorëzuar kontrollin administrativ të Gazës, si pjesë e një plani të ri paqeje.
Ndërkohë, Presidenti i Shteteve të Bashkuara, Donald Trump, pritet të shpallë para datës 25 dhjetor fazën e dytë të planit amerikan për Gazën. Kjo fazë përfshin tërheqjen e trupave izraelite nga enklava, krijimin e një force ndërkombëtare stabilizuese dhe ngritjen e strukturave të reja administrative, përfshirë të ashtuquajturat “Borde të Paqes”, që synojnë menaxhimin civil të territorit në periudhën e tranzicionit.
