Numri i viktimave nga tërmeti i fuqishëm që goditi Afganistanin javën e kaluar ka kaluar shifrën e 2.200 personave. Lajmi u bë i ditur të enjten nga një zëdhënës i qeverisë talibane, i cili konfirmoi se qindra trupa të pajetë janë nxjerrë nga rrënojat e shtëpive të shkatërruara.
Tërmeti me magnitudë 6 goditi disa provinca malore në lindje të vendit të dielën në mbrëmje, duke rrafshuar tërë fshatra dhe duke zënë banorët nën rrënoja. Zona më e prekur është Kunar, ku shumica e banorëve jetojnë në lugina të pjerrëta të rrethuara nga male të larta.
Zëdhënësi taliban Hamdullah Fitrat njoftoi se numri i viktimave ka arritur në 2.205 dhe shtoi se përpjekjet e kërkim-shpëtimit po vazhdojnë pa ndërprerje. “Janë ngritur strehimore për njerëzit dhe po shpërndahen ndihma emergjente”, deklaroi ai, duke theksuar angazhimin e autoriteteve.
Terreni i vështirë malor dhe rrëshqitjet e dheut po pengojnë ndjeshëm punën e ekipeve të shpëtimit. Autoritetet kanë përdorur helikopterë dhe kanë dislokuar trupa nga ajri për të mbërritur në zonat më të izoluara. Punonjësit e ndihmës raportojnë se shpesh janë të detyruar të ecin me orë të tëra për të arritur në fshatra të bllokuara.
Organizatat humanitare paralajmërojnë se mungesa e fondeve po kufizon reagimin ndaj krizës, duke e cilësuar këtë fatkeqësi si një “krizë brenda krizës”. Afganistani tashmë përballet me sfida të mëdha, përfshirë ndryshimet klimatike, thatësirën e zgjatur, gjendjen e rënduar ekonomike dhe kthimin e rreth 2 milionë refugjatëve nga vendet fqinje.
