Dy persona të armatosur që vranë 15 njerëz në Bondi Beach të Sydney-t të dielën janë identifikuar nga mediat lokale si Sajid Akram, 50 vjeç, dhe djali i tij Naveed Akram, 24 vjeç. Policia australiane konfirmoi se autorët ishin babë e bir. 50-vjeçari humbi jetën në vendngjarje, ndërsa djali ndodhet në gjendje kritike në spital.
Sipas autoriteteve, sulmi kishte në shënjestër persona hebrenj që po merrnin pjesë në një event për festën e Hanukës. Mes viktimave janë një vajzë 10-vjeçare, një rabin i lindur në Britani, një ish-oficer policie dhe një i mbijetuar i Holokaustit.
Policia bëri me dije se pranë vendit të ngjarjes u gjetën edhe dy pajisje shpërthyese të improvizuara, të cilat u neutralizuan. Hetimet vijojnë për të zbardhur plotësisht motivin e sulmit, përfshirë raportimet për elementë ekstremistë.
Një rol kyç në parandalimin e përshkallëzimit të mëtejshëm të dhunës pati qytetari Ahmed al-Ahmed, i cili u filmua teksa i rrëmbente armën njërit prej sulmuesve. Sipas prindërve të tij, ai u qëllua katër ose pesë herë në shpatull dhe po merr trajtim mjekësor. Veprimi i tij është cilësuar gjerësisht si heroik nga autoritetet dhe opinioni publik.
Kryeministri australian Anthony Albanese deklaroi se do të shtyjë për ligje më të ashpra për armët e zjarrit, duke zbuluar se sulmuesi më i madh në moshë kishte leje për armë zjarri për gjueti rekreative.
