Ish-presidentja e Irlandës, Mary Robinson, ka udhëtuar drejt pikës kufitare Rafah mes Egjiptit dhe Gazës, ku akuzoi Izraelin se po bllokon qëllimisht hyrjen e ndihmës humanitare në enklavën palestineze të uritur dhe të shkatërruar nga lufta.
Duke folur për gazetarët nga ana egjiptiane e kufirit të mbyllur, Robinson tha se kamionë me ndihma po refuzohen “pa asnjë arsye”, pavarësisht kontrolleve të rrepta nga Gjysmëhëna e Kuqe Egjiptiane dhe OKB-ja. “Pamë tenda, gjeneratorë, karroca invalidësh, paterica, libra për fëmijë – të gjitha të mbetura në magazina dhe të padorëzuara,” tha ajo.
Robinson vizitoi pikën kufitare si pjesë e grupit The Elders, së bashku me ish-kryeministren e Zelandës së Re, Helen Clark. Pas vizitës, ato e përshkruan situatën si një “gjenocid dhe urie në zhvillim” dhe bënë thirrje për sanksione ndërkombëtare ndaj kryeministrit izraelit Benjamin Netanyahu dhe kabinetit të tij të sigurisë. Ato kërkuan gjithashtu ndërprerjen e furnizimeve me armë për Izraelin dhe pezullimin e marrëveshjeve tregtare, përfshirë ato me BE-në.
Në një deklaratë të përbashkët, Robinson dhe Clark shprehën “tronditje dhe zemërim” për pengimin e qëllimshëm të ndihmës, duke thënë se kjo po shkakton përhapjen e urisë masive. Ato dënuan gjithashtu vrasjen e qëllimshme të gazetarit Anas al-Sharif dhe katër kolegëve të tij në Gaza, duke e cilësuar si përpjekje për të “heshtur të vërtetën”.
Në të njëjtën linjë, ministri i Jashtëm irlandez, Simon Harris, së bashku me homologët e 24 vendeve të tjera, paralajmëruan se uria “po zhvillohet para syve tanë” dhe bënë thirrje për hapjen e menjëhershme të të gjitha pikave kufitare për hyrjen e ndihmës masive. Deklarata, e nënshkruar edhe nga përfaqësues të lartë të BE-së, falënderoi SHBA-në, Katarin dhe Egjiptin për përpjekjet drejt një armëpushimi që do t’i japë fund luftës dhe do lejojë hyrjen e pakushtëzuar të ndihmës humanitare.
Disa vende të BE-së, përfshirë Gjermaninë dhe Hungarinë, nuk e kanë firmosur deklaratën. Ndërkohë, agjencitë e OKB-së dhe OJQ-të ndërkombëtare paralajmërojnë se kufizimet e reja të regjistrimit nga Izraeli mund të detyrojnë shumë organizata të largohen nga territoret e pushtuara deri më 9 shtator, duke përkeqësuar krizën.
