Shtëpia e Bardhë jep një përgjigje të çuditshme ndaj një pyetjeje të thjeshtë të bërë nga një gazetar i HuffPost
Një pyetje e zakonshme lidhur me zgjedhjen e vendit ku presidenti Donald Trump do të takohet me presidentin rus Vladimir Putin ka shkaktuar një reagim të pazakontë nga zëdhënësit e Shtëpisë së Bardhë.
Pasi Trump njoftoi edhe një takim tjetër me Putinin — këtë herë në Budapest — HuffPost kontaktoi zëdhënësit kryesorë të Shtëpisë së Bardhë me një pyetje të thjeshtë: Pse Budapest?
Vlen të kujtohet se kryeqyteti hungarez ishte vendi ku në vitin 1994 u firmos Memorandumi i Budapestit, përmes të cilit Ukraina hoqi dorë nga mijëra armë bërthamore të trashëguara pas shpërbërjes së Bashkimit Sovjetik, në këmbim të garancive se Rusia do të respektonte integritetin e saj territorial.
Putin e theu këtë premtim më 2014 me pushtimin dhe aneksimin e Krimesë, me ofensivën ushtarake në Donbas për më shumë se një dekadë dhe më pas me pushtimin e plotë në vitin 2022. Ai vazhdon edhe sot të vrasë civilë ukrainas me sulme të rregullta me dronë dhe raketa.
Duke pasur parasysh këtë histori, HuffPost pyeti Shtëpinë e Bardhë: Kush e zgjodhi Budapestin?
Sekretarja për shtyp e Shtëpisë së Bardhë, Karoline Leavitt, u përgjigj pas pak minutash: “Mami yt.”
Pas një minute, Drejtori i Komunikimit të Shtëpisë së Bardhë, Steven Cheung, shtoi një përgjigje edhe më të shkurtër: “Mami.”
Kur HuffPost e pyeti Leavitt nëse e konsideronte përgjigjen e saj si shaka, ajo reagoi sërish:
“Mua më duket qesharake që ti e konsideron veten gazetar. Je një aktivist i së majtës ekstreme që askush nuk të merr seriozisht, përfshirë kolegët e tu në media – ata thjesht nuk ta thonë në sy. Mos më dërgo më pyetje të rreme, të njëanshme dhe plot budallallëqe.”
HuffPost deklaroi me ironi se është i “shkatërruar” dhe tani ka frikë të bëjë pyetje të tjera, e aq më pak të përgjigjet me stilin “Unë jam guma, ti je ngjitësi”.
