Legjenda britanike e boksit, Ricky Hatton, është gjetur i vdekur në shtëpinë e tij në Greater Manchester. Ish-kampioni i lindur në Stockport ishte 46 vjeç.
Policia ka vendosur kordon sigurie në banesën e tij në rrugën Bowlacre Road në Gee Cross, Hyde. Greater Manchester Police (GMP) ka konfirmuar se një trup është gjetur në orën 06:45 të mëngjesit të sotëm dhe vdekja nuk po trajtohet si e dyshimtë.
Lajmi tronditës vjen pak kohë pasi ish-kampioni i botës kishte shpallur rikthimin e tij në ring me një ndeshje të planifikuar për në dhjetor.
Ish-kampioni tjetër botëror dhe miku i Hatton-it, Amir Khan, reagoi menjëherë duke i bërë homazh në rrjetin X, ku e përshkroi si “mentor, luftëtar dhe një nga boksierët më të mëdhenj të Britanisë”.
Gjatë karrierës së tij, Hatton mbajti disa tituj botërorë dhe kombëtarë, ndërsa në vitin 2015 u shpall “Boksieri i Vitit”. Ai fitoi tituj në kategorinë light-welterweight dhe welterweight, duke fituar zemrat e publikut me stilin e tij luftarak dhe energjik.
Në ring, Hatton u përball me disa nga më të mëdhenjtë e gjeneratës së tij, mes tyre Kostya Tszyu, Floyd Mayweather dhe Manny Pacquiao.
