Një valë tensionesh diplomatike është ndezur mes Romës dhe Parisit pas komenteve të zëvendëskryeministrit italian, Matteo Salvini, ndaj presidentit francez Emmanuel Macron.
Ministria e Jashtme franceze thirri ambasadoren italiane në Paris, Emanuela D’Alessandro, duke i cilësuar deklaratat e Salvinit si të papranueshme dhe në kundërshtim me marrëdhëniet historike të besimit mes dy vendeve.
Gjatë një interviste në Milano, Salvini u pyet për mundësinë e dërgimit të trupave italiane në Ukrainë, nëse do të arrihet një armëpushim. Duke ironizuar, ai tha se nëse Macron e dëshiron këtë, atëherë “le të marrë helmetën dhe pushkën e të shkojë vetë”.
Kreu i Ligës, i njohur për retorikën e tij kundër emigrantëve dhe si aleat i Marine Le Pen, ka sulmuar më herët Macron-in, duke e akuzuar se po shtyn Evropën drejt një përplasjeje me Rusinë. Ndërkohë, Franca dhe Britania kanë paralajmëruar krijimin e një “aleance të vullnetit” për të dërguar trupa në Ukrainë si garanci sigurie pas një marrëveshjeje paqeje, por kryeministrja italiane Giorgia Meloni ka mohuar që Italia do të përfshihet në një skenar të tillë.
