Kryeministri në detyrë i Kosovës, Albin Kurti, ka paralajmëruar se vendi mund të përballet me dy palë zgjedhje parlamentare brenda pak muajsh, pas dështimit për të siguruar shumicën e nevojshme në Kuvend për mandatin e tij të tretë.
Duke folur në një konferencë për media në Prishtinë, një ditë pas seancës ku kabineti i tij nuk mori votëbesimin, Kurti tha se zhvillimet e ardhshme politike, përfshirë edhe zgjedhjen e presidentit në pranverë, mund ta çojnë vendin sërish në zgjedhje.
“Mbase është për të ardhur keq që do të mund të kemi, përveç balotazhit të zgjedhjeve lokale në nëntor, edhe dy herë zgjedhje – në dimër dhe në pranverë,” tha Kurti.
Sipas tij, mungesa e shumicës për formimin e Qeverisë e bën edhe më të vështirë arritjen e një konsensusi për zgjedhjen e presidentit të ri, pasi mandati i tanishëm i Vjosa Osmanit përfundon në prill të vitit 2026.
“Kur nuk arritëm t’i bëjmë 61 deputetë për një qeveri të re, atëherë është vështirë e imagjinueshme që do t’i bëjmë kollaj 80 deputetë në pranverën e vitit të ardhshëm,” shtoi ai.
Në seancën e së dielës, vetëm 56 deputetë votuan për kabinetin e propozuar nga Kurti, pesë më pak se shumica e nevojshme prej 61 votash. Pesëdhjetë e dy deputetë votuan kundër, ndërsa katër abstenuan.
Pas këtij rezultati, Kushtetuta e Kosovës i jep presidentes Vjosa Osmani 10 ditë kohë për të mandatuar një kandidat tjetër për formimin e Qeverisë. Megjithatë, lideri i Partisë Demokratike të Kosovës (PDK), Memli Krasniqi, ka refuzuar mundësinë që të marrë mandatin nëse i ofrohet, duke deklaruar se nuk e ka shumicën parlamentare.
Në rast se dështon edhe përpjekja e dytë për formimin e Qeverisë, presidentja është e detyruar të shpallë zgjedhje të reja, të cilat duhet të mbahen brenda 40 ditësh.
