Rezultatet e pafavorshme të zgjedhjeve të djeshme në Shtetet e Bashkuara për Partinë Republikane janë pranuar publikisht nga presidenti amerikan Donald Trump, i cili mëngjesin e sotëm u pa duke ngrënë mëngjes me disa nga ligjvënësit konservatorë.
Një ditë pas zgjedhjes së Zohran Mamdani-t si kryetar i Bashkisë së Nju Jorkut, Trump komentoi për herë të parë mbi rezultatin, duke e cilësuar të papërshtatshëm për republikanët.
“Nuk mendoj se ishte mirë për republikanët,” tha ai para gazetarëve, duke shtuar se diskutimet më të thella mbi këtë çështje do të zhvillohen pas mbylljes së seancës me median.
Sipas Trump, një nga arsyet kryesore që ndikuan në rezultatet e këtyre zgjedhjeve ishte mbyllja e qeverisë federale, e cila solli pezullimin e përkohshëm të funksionimit të shumë agjencive dhe institucioneve publike, për shkak të mosmarrëveshjeve midis demokratëve dhe republikanëve lidhur me projektligjin e buxhetit.
“Shumë njerëz, bazuar në sondazhet që kemi parë, na fajësojnë ne për mbylljen e qeverisë. Kjo ka ndikuar në perceptimin publik dhe në rezultatet,” tha Trump. Presidenti amerikan, ndërkohë, i bëri thirrje republikanëve në Senat që të veprojnë me vendosmëri dhe të shfuqizojnë filibusterin, një procedurë parlamentare që lejon debat të pakufizuar për projektligjet, shpeshherë me qëllim vonimin ose bllokimin e miratimit të tyre.
“Është koha që republikanët të bëjnë atë që duhet të bëjnë, dhe kjo është të shfuqizojnë filibusterin,” u shpreh Trump, duke paralajmëruar se nëse kjo nuk ndodh, partia e tij do të gjendet në një pozitë të vështirë për të kaluar çdo iniciativë ligjore në të ardhmen.
