Kryeministri i Australisë, Anthony Albanese, u detyrua të largohej më herët nga një vizitë në një xhami në Sidnej, pasi situata u tensionua dhe disa pjesëmarrës nisën ta ofendonin dhe të bërtisnin kundër tij.
Albanese, së bashku me Ministrin e Brendshëm Tony Burke, ndodheshin në xhaminë Lakemba, një nga më të mëdhatë në Australi, ku kishin shkuar me ftesë të liderëve të komunitetit për të marrë pjesë në namazin e Fitër Bajrami.
Gjatë aktivitetit, disa persona i akuzuan zyrtarët si “mbështetës të gjenocidit”, duke thirrur “boo” dhe “largohuni nga këtu”. Në të njëjtën kohë, një prej liderëve të xhamisë kërkoi në fjalën e tij që qeveria të angazhohej më shumë me komunitetin mysliman në vend.
Ngjarja vjen në një klimë pakënaqësie brenda komunitetit mysliman në Australi, lidhur me reagimin e qeverisë ndaj konfliktit Izrael-Gaza dhe rritjes së islamofobisë.
Pas përfundimit të fjalimit, kryeministri u largua mes turmës, ndërsa më pas Shoqata Myslimane Libaneze, që administron xhaminë, deklaroi se ai ishte i mirëpritur dhe se dyert e institucionit do të mbeten të hapura.
“E kuptojmë se emocionet janë të forta, veçanërisht për shkak të vuajtjeve në Gaza dhe shkatërrimit në Liban,” thuhej në reagim.
Nga ana e tij, Albanese u shpreh se shumica e mbi 30 mijë pjesëmarrësve e pritën pozitivisht, duke sugjeruar se incidenti mund të lidhet edhe me vendimet e fundit të qeverisë për ndalimin e organizatave ekstremiste si Hizb ut-Tahrir.
Kjo nuk është hera e parë që politikanët përballen me reagime të përziera gjatë festave fetare, ndërsa kritikët theksojnë se evente të tilla nuk duhet të përfshihen në debate politike.
