Fondacioni Hind Rajab (HRF) dhe Qendra Palestinase për të Drejtat e Njeriut (PCHR) kanë dorëzuar një komunikim sipas Nenit 15 në Gjykatën Penale Ndërkombëtare (GJPN), duke kërkuar hetim për vrasjen e gazetarit të Al Jazeera-s, Anas Al-Sharif, dhe katër kolegëve të tij nga Izraeli më 10 gusht. Ngjarja është përshkruar si një “akt kriminal i pastër dhe krim lufte”.
Sipas njoftimit në faqen e HRF, fondacioni ka hetuar zinxhirin e komandës dhe vendimet operative që çuan në vrasjen e Al-Sharif, ndërsa PCHR ka dokumentuar në mënyrë të detajuar edhe rastet e tjera të gazetarëve të Al Jazeera-s të vrarë në Gaza, përfshirë Hussam Shabat, Ismail Al-Ghoul, Ahmed Al-Louh, Hamza Wael Al-Dahdouh dhe Samer Abu Daqa.
Hetimi i HRF ka identifikuar gjithashtu personat e përfshirë në sulmin ku humbën jetën edhe gazetarët Mohammed Qreiqeh, Ibrahim Zaher, Mohammed Noufal dhe Moamen Aliwa.
Mes zyrtarëve të lartë ushtarakë izraelitë të përmendur në dosje janë Shefi i Shtabit të Përgjithshëm Eyal Zamir, komandanti i Forcave Ajrore Tomer Bar dhe komandanti i Komandës së Jugut Yaniv Asor. Në krye të përgjegjësisë, sipas HRF, qëndron kryeministri izraelit Benjamin Netanyahu.
Përveç lidershipit ushtarak, HRF ka përmendur edhe Avichay Adraee, anëtar i Divizionit të Medias Arabe të Njësisë së Zëdhënësit të Ushtrisë Izraelite, i cili akuzohet për një fushatë të vazhdueshme shpifjesh ndaj Al-Sharif, duke krijuar “miratim publik” për vrasjen e tij përmes pretendimeve të pabaza që e lidhin me Hamasin.
