Një gjykatë në Spanjë ka hedhur poshtë një padi për sulm dhe ngacmim seksual ndaj këngëtarit Julio Iglesias, duke argumentuar se autoritetet spanjolle nuk kanë juridiksion për të hetuar ngjarjet e dyshuara, të cilat pretendohet se kanë ndodhur në Bahamas dhe Republikën Dominikane.
Padia ishte ngritur më 5 janar nga dy ish-punonjëse të artistit 82-vjeçar, të cilat pretendonin se ishin viktima të ngacmimit seksual, ndërsa njëra prej tyre kishte përshkruar për mediat episode që, sipas saj, mund të përbënin përdhunim.
Sipas zyrës së prokurorit, gjykatat spanjolle nuk mund të shqyrtojnë çështjen, pasi as paditëset dhe as Iglesias nuk janë shtetas spanjollë, nuk banojnë në Spanjë dhe incidentet e dyshuara nuk kanë ndodhur në territorin spanjoll. Gjykata sqaroi se ndërhyrja do të ishte e mundur vetëm në rast se vendet ku kanë ndodhur ngjarjet nuk do të ishin në gjendje ose të gatshme për t’i hetuar ato, gjë që nuk u konstatua në këtë rast.
Që prej daljes në publik të çështjes në mesin e janarit, Iglesias dhe përfaqësuesi i tij ligjor e kanë mbështetur mbrojtjen në mungesën e juridiksionit të gjykatave spanjolle, duke theksuar se ngjarjet e dyshuara kanë ndodhur në prona të këngëtarit në Republikën Dominikane dhe Bahamas.
Ndërkohë, dy organizata joqeveritare që asistuan paditëset sqaruan se padia ishte paraqitur në Spanjë, pasi legjislacioni spanjoll konsiderohet më i favorshëm për trajtimin e rasteve të tilla.
