Një burrë 55-vjeçar nga Roma ka pretenduar publikisht se është djali i fshehtë i këngëtarit legjendar italian Adriano Celentano, duke kërkuar verifikimin e atësisë përmes një testi ADN.
Antonio Maria Segatori e bëri deklaratën në një intervistë për revistën italiane Oggi, ku tregoi se nëna e tij, Maria Luigia Biscardi, kishte qenë këngëtare e re në vitet ’60 dhe kishte hyrë në grupin artistik “Clan Celentano”. Sipas tij, pikërisht në atë periudhë ajo kishte pasur një marrëdhënie me Celentanon.
Segatori tha se nuk kërkon asgjë tjetër përveçse të dijë të vërtetën dhe se është i gatshëm t’i drejtohet edhe gjykatës për të kërkuar një test ADN që do të përcaktonte nëse këngëtari është babai i tij biologjik.
Nga ana tjetër, Adriano Celentano reagoi me ironi në rrjetet sociale, duke mohuar pretendimin. “Më vjen keq ta them… unë nuk jam babai yt. Në fakt jam gjyshi yt”, shkroi ai.
Historia ka bërë bujë në mediat italiane dhe pritet të shihet nëse çështja do të përfundojë në një proces ligjor për të verifikuar pretendimin.
