Kryeministri i qeverisë së rebelëve Huthi në Jemen, Ahmed al Rahawi, është vrarë gjatë një serie sulmesh ajrore të ushtrisë izraelite në kryeqytetin Sana’a. Sulmet, të cilat goditën objektiva të rëndësishëm ushtarakë, kanë shkaktuar humbje të tjera në radhët e udhëheqjes së lartë të milicisë shiite të mbështetur nga Irani.
Sipas burimeve lokale, Al Rahawi humbi jetën në apartamentin e tij së bashku me disa bashkëpunëtorë të afërt, gjatë një bombardimi preciz të forcave izraelite. Autoritetet izraelite njoftuan se besohet se mes të vrarëve janë edhe ministri i Mbrojtjes së Huthive, Mohamed al Atifi, dhe shefi i Shtabit të Përgjithshëm të forcave rebele, të cilët ndodheshin në një lokalitet në rrethinat e kryeqytetit.
Sulmet përkuan me një fjalim të paralajmëruar të liderit suprem të Huthive, Abdul Malik al Houthi, megjithatë, sipas autoriteteve izraelite, ai nuk ndodhej në zonat e goditura.
Ministri izraelit i Mbrojtjes, Israel Katz, i cili miratoi operacionin së bashku me kryeministrin Benjamin Netanyahu dhe shefin e shtabit të ushtrisë, gjeneralin Eyal Zamir, deklaroi se kjo ishte një përgjigje e drejtpërdrejtë ndaj sulmeve të Huthive ndaj Izraelit dhe objektivave ndërkombëtare në rajon.
“Sikurse i kishim paralajmëruar, kush vë dorë ndaj Izraelit, do t’i priten duart”, u shpreh Katz në një deklaratë zyrtare.
Zyrtarë të Forcave të Mbrojtjes të Izraelit (IDF) konfirmuan se goditja kishte në shënjestër “regjimin terrorist ushtarak të Jemenit”.
Rebelët Huthi, të cilët kontrollojnë pjesën më të madhe të Jemenit veriperëndimor, përfshirë kryeqytetin Sana’a dhe aksesin në Detin e Kuq, kanë ndërmarrë sulme të vazhdueshme me raketa dhe dronë kundër Izraelit dhe anijeve ndërkombëtare që nga shpërthimi i luftës Izrael-Hamas në Gaza, në tetor 2023. Këto veprime janë paraqitur nga rebelët si shenjë solidariteti me popullin palestinez.
Ndërkohë, nuk ka ende një reagim zyrtar nga udhëheqja Huthi mbi vdekjen e Al Rahawit dhe zyrtarëve të tjerë të lartë.
