Kryeministrja e Italisë, Giorgia Meloni, ka mbajtur një fjalim të fortë në Asamblenë e Përgjithshme të Kombeve të Bashkuara, ku kritikoi hapur veprimet e Izraelit në Luftën e Gazës. Ajo u shpreh se Tel Avivi ka tejkaluar kufijtë e proporcionalitetit dhe ka thyer normat themelore humanitare, duke shkaktuar viktima masive në mesin e civilëve.
"Izraeli e ka tejkaluar kufirin e parimit të proporcionalitetit, duke thyer normat humanitare dhe duke shkaktuar një masakër midis civilëve. Izraelit duhet të dalë nga kurthi i kësaj lufte. Duhet ta bëjë këtë për historinë e popullit hebre, për demokracinë e tij, për të pafajshmit, për vlerat universale të botës së lirë, pjesë e së cilës është”, deklaroi Meloni në fjalën e saj.
Kryeministrja italiane theksoi gjithashtu se Italia mbështet zgjidhjen me dy shtete dhe njohjen e një shteti palestinez, por sqaroi se ky hap nuk mund të ndërmerret për sa kohë që Hamasi vijon të ketë një rol qeverisës në enklavë. Ajo e konsideroi këtë organizatë terroriste si përgjegjësen kryesore për shpërthimin e konfliktit, duke iu referuar sulmit të 7 tetorit 2023 ndaj Izraelit.
“Hamasi është ai që nisi këtë luftë përmes një akti të pashembullt terrorizmi. Njohja e një shteti palestinez nuk mund të bëhet duke shpërblyer terrorizmin, por vetëm kur garantohen kushtet për paqe dhe stabilitet afatgjatë”, theksoi Meloni.
Në fjalimin e saj, kreu i qeverisë italiane foli edhe për luftën në Ukrainë, duke akuzuar hapur Rusinë për shkelje flagrante të së drejtës ndërkombëtare. Ajo tha se Moska ka shkelur qëllimisht Nenin 2 të Kartës së Kombeve të Bashkuara, duke cënuar sovranitetin dhe integritetin territorial të një shteti të pavarur, me synimin e qartë për të aneksuar territore të reja.
Sipas Melonit, deri më sot Rusia nuk ka treguar asnjë gatishmëri për të marrë seriozisht thirrjet e komunitetit ndërkombëtar për t’u ulur në tryezën e negociatave për paqe. “Kjo plagë e thellë e shkaktuar mbi të drejtën ndërkombëtare ka krijuar pasoja destabilizuese që shkojnë shumë përtej kufijve të kësaj lufte”, nënvizoi ajo.
