Qeveria izraelite ka reaguar me tone të forta pas njoftimit për përbërjen e Bordit Ekzekutiv të Gazës, duke deklaruar se vendimi është marrë pa asnjë koordinim me Izraelin dhe se bie në kundërshtim me politikën e tij zyrtare.
Në një deklaratë zyrtare, Zyra e Kryeministrit bën me dije se çështja është vlerësuar si mjaft serioze, aq sa kryeministri ka udhëzuar Ministrin e Punëve të Jashtme të ndërhyjë drejtpërdrejt në nivelet më të larta diplomatike.
Sipas deklaratës, ministri i Jashtëm është ngarkuar të kontaktojë Sekretarin e Shtetit të Shteteve të Bashkuara për të kërkuar shpjegime lidhur me këtë zhvillim. Qeveria izraelite thekson se njoftimi për përbërjen e Bordit Ekzekutiv të Gazës, i cili vepron nën ombrellën e Bordit të Paqes, është bërë pa konsultim me Izraelin dhe përbën një veprim që nuk përputhet me qëndrimet dhe politikat e tij.
“Njoftimi për përbërjen e Bordit Ekzekutiv të Gazës nuk është koordinuar me Izraelin dhe është në kundërshtim me politikën e tij. Kryeministri ka udhëzuar Ministrin e Punëve të Jashtme të kontaktojë Sekretarin e Shtetit të SHBA-së për këtë çështje”, thuhet në deklaratën zyrtare.
