Ministria e Jashtme e Izraelit ka reaguar ashpër ndaj kryebashkiakut të ri të Nju Jorkut, Zohran Mamdani, pas vendimit të tij për të shfuqizuar disa urdhra ekzekutivë të miratuar nga paraardhësi i tij, Eric Adams. Në një postim në rrjetin social X, diplomacia izraelite e akuzoi Mamdanin se po “hedh benzinë antisemitike mbi një zjarr të hapur”, duke paralajmëruar se heqja dorë nga përkufizimi i antisemitizmit sipas Aleancës Ndërkombëtare për Kujtimin e Holokaustit (IHRA) dërgon sinjale të rrezikshme për komunitetin hebre dhe për klimën publike në qytet.
Sipas Ministrisë së Jashtme të Izraelit, përkufizimi i IHRA-së është një standard ndërkombëtar i domosdoshëm për identifikimin dhe luftimin e antisemitizmit, ndërsa braktisja e tij në një qytet si Nju Jorku, ku jeton një nga komunitetet hebre më të mëdha në botë, shihet si një hap regresiv. Diplomacia izraelite bëri të ditur se po ndjek nga afër zhvillimet dhe se pret sqarime të mëtejshme nga autoritetet e qytetit për drejtimin që do të marrin politikat e reja.
Nga ana e tij, Mamdani ka mbrojtur vendimin, duke theksuar se shfuqizimi i urdhrave ekzekutivë synon t’i japë administratës së re një “fillim të pastër” dhe të rishikojë politikat e trashëguara pa paragjykime politike. Sipas tij, përkufizimi i IHRA-së është përdorur shpesh për të barazuar kritikën ndaj politikave të shtetit të Izraelit me antisemitizmin, duke kufizuar lirinë e shprehjes dhe debatin politik. Ai ka theksuar se kundërshtimi i politikave të një qeverie nuk përbën urrejtje ndaj një komuniteti fetar apo etnik.
Sipas Guardian, Mamdani ka garantuar se administrata e tij do të vazhdojë të mbajë aktive zyrën e posaçme për luftimin e antisemitizmit dhe se mbrojtja e komunitetit hebre mbetet prioritet. Ai ka shtuar se qyteti i Nju Jorkut duhet të jetë një hapësirë ku luftohet antisemitizmi në çdo formë, por njëkohësisht mbrohet edhe e drejta për kritikë politike dhe për shprehje të lirë, pa frikën e sanksioneve institucionale.
