Izraeli është vënë në gjendje gatishmërie të lartë për shkak të mundësisë së një ndërhyrjeje ushtarake të Shteteve të Bashkuara në Iran, ndërsa autoritetet iraniane po përballen me protestat më të mëdha kundër qeverisë në vite, bëjnë të ditur burime izraelite për Reuters.
Presidenti amerikan Donald Trump ka kërcënuar vazhdimisht ditët e fundit me ndërhyrje, duke paralajmëruar udhëheqësit e Teheranit që të mos përdorin forcë kundër demonstruesve. Të shtunën, Trump deklaroi se SHBA “është gati të ndihmojë”.
Burime izraelite, të pranishme në konsultime sigurie gjatë fundjavës, nuk sqaruan se çfarë përfshin konkretisht kjo gjendje alarmi. Izraeli dhe Irani u përplasën në një luftë 12-ditore në qershor, gjatë së cilës SHBA iu bashkua Izraelit në sulme ajrore ndaj objektivave iraniane.
Sipas një burimi izraelit, kryeministri Benjamin Netanyahu dhe Sekretari amerikan i Shtetit, Marco Rubio, diskutuan të shtunën në telefon mundësinë e një ndërhyrjeje amerikane në Iran. Një zyrtar amerikan konfirmoi bisedën, por pa dhënë detaje mbi temat e trajtuara.
Ndërkohë, autoritetet iraniane kanë sinjalizuar se mund të ashpërsojnë goditjen ndaj protestave masive që kanë përfshirë vendin. Izraeli, zyrtarisht, nuk ka shprehur dëshirë për të ndërhyrë drejtpërdrejt, por tensionet mbeten të larta për shkak të shqetësimeve izraelite mbi programin bërthamor dhe raketor të Iranit.
Në një intervistë për The Economist, Netanyahu paralajmëroi se çdo sulm iranian ndaj Izraelit do të sillte “pasoja të tmerrshme”, duke shtuar se lidhur me protestat “duhet parë se çfarë po ndodh brenda Iranit”.
