Numri i ushtarëve italianë të vendosur në bazën Ali Al Salem në Kuvajt është reduktuar ndjeshëm. Fillimisht ishin 41, por pas nisjes së një grupi tjetër për t’u larguar nga vendi, në bazë kanë mbetur pak më shumë se 20 ushtarë, minimumi i nevojshëm për të mos e mbyllur plotësisht këtë postë ushtarake.
Një natë më parë, përmes një operacioni të koordinuar nga shërbimet e inteligjencës, edhe personel tjetër ushtarak italian u evakuua nga Bagdadi, duke kaluar fillimisht në Kurdistan, më pas në Turqi dhe në fund në Itali. Ministri italian i Mbrojtjes, Guido Crosetto, njoftoi se edhe nga Erbili një patrullë e vogël do të largohet në orët në vijim nga territori irakian, i cili konsiderohet i ekspozuar ndaj hakmarrjes së mundshme të Iranit.
Megjithatë, për momentin ambasada italiane nuk do të mbyllet.
Këto lëvizje janë pjesë e asaj që qeveria italiane e quan një “rimodulim të kujdesshëm” të pranisë së saj në rajon, vendim i marrë nga Palazzo Chigi dhe i zbatuar nga Ministria e Mbrojtjes.
Ky zhvillim shihet gjithashtu si një sinjal se lufta e nisur nga presidenti amerikan Donald Trump nuk po pritet mirë në Romë dhe po krijon siklet politik për qeverinë italiane të drejtuar nga Giorgia Meloni.
Italia ka zgjedhur të mbajë një distancë të kujdesshme nga ofensiva amerikane kundër Iranit. Kryeministrja Meloni ka firmosur deklaratën e G7 së bashku me vendet e tjera europiane, por pa përfshirjen e Uashingtonit, ndërsa Roma ka refuzuar të marrë pjesë në një mision ushtarak në ngushticën e Hormuzit, të kërkuar nga Trump.
Ministri Crosetto theksoi se shumë vende kanë refuzuar një mision që mund të interpretohej si hyrje në luftë. Sipas tij, një operacion i tillë duhet të ishte multilateral, ndoshta nën drejtimin e Kombeve të Bashkuara.
Ndërkohë, prania ushtarake italiane në rajonin e Gjirit mbetet një shqetësim për qeverinë në Romë, pasi bazat mund të bëhen objekt hakmarrjeje nga Teherani. Në orët e fundit, në Palazzo Chigi janë diskutuar skenarë për sigurinë e këtyre bazave, përfshirë mundësinë e mbylljes së ambasadave, riatdhesimin e ushtarëve dhe transferimin e dokumenteve të ndjeshme dhe teknologjive strategjike.
Në të njëjtën kohë, diplomacia italiane po përpiqet të kufizojë pasojat e krizës dhe të ruajë marrëdhëniet me aleatët në rajon, si Kuvajti, Emiratet e Bashkuara Arabe dhe Katari, vende me të cilat Italia ka marrëveshje të rëndësishme energjetike dhe kontrata strategjike.
Qeveria italiane po përpiqet të shmangë përplasjen direkte me administratën Trump, por njëkohësisht po thekson nevojën për de-eskalim dhe diplomaci. Kryeministrja Meloni deklaroi se Italia nuk merr pjesë në sulmet kundër Iranit dhe se prioriteti i saj është ulja e tensioneve.
Sipas saj, bota po përjeton një krizë të dukshme të së drejtës ndërkombëtare, ku vendimet unilaterale po shtohen dhe institucionet ndërkombëtare po bëhen gjithnjë e më pak efektive.
